پِث،بچ او کھر (چُکانی کِسّو)

دو مڑدم راہا روغ اثنت۔دوئیں پث بچ اثنت۔یَہ  کھرے دِہ مہار کثغا پجیا گون اِثِش۔ روانا روانا

دَگّا یَہ مڑدے دیثئیش۔

آں مڑدا دوئیں پث بچ گوں کھرا کہ دیثغنت۔راگانی او چَہوہانی کنغ شروع کثئی کہ چیں گنوخیں مڑدم انت۔ کھرا مہار کثغا برغنت چڑھنتی ناں۔

اے گالوار اشکثہ پثا بچ کھر چکا نیاذینتہ۔ وث کھرئے مہار گفتئو راہا رائی بیثہ۔

 روانا روانا راہا یکے تی مڑدے تریٹثئیش۔ آں مڑدا اے دوئیں کہ دیثغنت رفتہ چوروا شغان تانہہ کنغا کہ چیں نالائکیں ،چیں زالمیں بچ یے۔ چیں ناروائی یے کنغیں۔ وث کھرا سواریں او پیریں پِثا پیادغیغاجزینغ ایں۔ اے گالوار اشکثہ بچ لیزم بیثہ شہ کھرا  ایر کفتہ ۔ پث کھرا سوار کثئی۔ تَرّثہ اے دَگّا

روانہ بیثغنت۔

رواناروانا اغد تی مڑدے ٹکرتئیش۔ آنہیا پِثا پھیٹ لانت کنغ شروع کثہ۔کہ وث تہ کھرا سواریں او بُلوئیں،مَہسُومیں چُکا پیاذغیغا ٹورغیں۔ اے ٹونک اشکثہ پِث لجی بیثہ۔ بَچّا را گوئشتئی تئو دِہ بیا کھرا سوار بی۔ 

نی پِث بچ ہردوئیں کھرا سواریغا روغ اثنت۔یکے تی مڑدمے ایشاں گندیث۔ گوں گِندغا  لانت ملامت کنغ شروع کنت اِش کہ شا چیں زالمیں آدمی یے۔ شار گنگدام ئے غریبئے پیڈ خیال نیستیں۔ ہردوئیں سُوندھا ساھدارا سوارے۔ چی یے شرما کنے۔ شہ خُذائا تُڑسے۔ 

اے ٹونک اشکثہ پث بچ دوئیں شہ کھرا ایر کفتغنت۔ نی گؤشتئیش بیائث کھرا زیروں ۔نواں شہ مخلوکئے گالواراں جانے چھٹیث ایں۔ نی دوئیناں کھر زڑتئو کوفغا کثہ ۔ تَرّثو وثی راہ گِفتئیش۔

روانا روانا پھئوژے گِندیث اِش۔ آں پھئوژ ایشانی گنوخ تائی چکا کندغ او راگانی کنغ شروع کنت۔ 

اے کُلیں مڑدانی گالوار،شغان تانہہ ،پھیٹ لانت، راگ و چَہوہ اشکثو دوئیں پِث بچانی دِلا آس پاذ آتکہ۔

ہشت دہ گام چکا یَہ پُلے اث۔ پُل شیرا مزیں لہڑے چئولاں جنانا وہغ اث۔ اے مڑدم پُل چکا کہ پُجثغنت ۔ گوں پُجغا کھر کہ کوفغا گون اِثِش،پُل ئا بُنا چغل داثئیش۔بِلاّں ناں سغر بیث ،ناں  دڑد کنت۔